НЕСТ БОД, ТЕРРОРИЗМ!

Дар ибтидои асри XXI инсоният бо хатари ҷиддие рӯ ба рӯ гаштааст, ки номи он терроризми байналмилалӣ мебошад. Терроризм ва ифротгароӣ аз зуҳуроти номатлуб дар замони имрӯза ба шумор меравад, зеро ин падидаҳо боиси ба миён омадани оқибатҳои фалокатбор шуда истодааст. Истилоҳи терроризм аслан маънои тарс ва даҳшатро доро мебошад. Террористон дар ҳама ҳолат барои пурзӯр намудани манфиати худ зӯроварӣ ва тарсониданро мавриди истифода қарор медиҳанд.

Имрӯз  терроризм дар минтақаҳои гуногуни ҷаҳон доман паҳн карда, ха­тари бузурги иҷтимоӣ дорад ва барои амнияти давлатҳои алоҳида ва минтақаҳо воқеан таҳдид эҷод менамояд. Сарфи назар аз тадбирҳои солҳои охир андешидашуда дар бахши мубориза бо терроризм, таҳдиди амалҳои нави террористӣ нафақат аз байн нарафтааст, балки афзоиш ёфтааст. Дар гӯшаҳои гуногуни ҷаҳон фаъолшавии созмонҳои террористӣ ва ташкилоту созмонҳои маблағгузори онҳо ба мушоҳида мерасад. Тоҷикистон ҳамчун давлати соҳибихтиёр, демократӣ, ҳуқуқбунёд ва дунявию иҷтимоӣ узви ҷомеаи ҷаҳонӣ буда, дар ҷараёни таҳаввулоти босуръати ҷаҳонишавии муносибатҳои иқтисодию иҷтимоӣ ва рушди соҳаҳои гуногуни ҳаёт қарор дорад.

Имрӯз дар як қатор давлатҳо ҷангҳои харобиовар идома дошта, боиси афзоиши шумораи фирориёни иҷборӣ, бекорӣ, гуруснагӣ ва шиддат гирифтани муаммоҳои дигари иҷтимоӣ гардидаанд. Терроризм ва ифротга­роӣ беш аз ҳарвақта авҷ гирифта, бо оқибатҳои даҳшатбору бераҳмонаи худ ба проблемаи ҷиддитарини инсо­ният дар асри бисту як табдид ёфта­аст.

Ифротгароӣ асосҳои маънавии ҷомеаро вайрон намуда, ба амнияти минтақа, тамоми ҷаҳон, аз ҷумла, ба ам­нияти Ҷумҳурии Тоҷикистон таҳдид мекунад. Ба муқобили ифротгароӣ бояд ҳама дастаҷамъона мубориза барем. Айни замон чандин гурӯҳҳои террористӣ барои анҷом додани ғаразҳои сиёсии худ фаъолият доранд. Мақсади асосии ин гурӯҳҳо ноором кардани вазъи ҷаҳон аст.

Вобаста ба ин Ҷумҳурии Тоҷикистон ҳамчун узви комилҳуқуқи ҷомеаи ҷаҳонӣ мубориза алайҳи терроризм ва экстремизмро аз ҳадафҳои асосии худ қарор дода, дар ин самт тадбир меандешад.

                                                             Бадриддин ШАРИФЗОДА,

                                                                        судяи Суди вилоят