НАХЛИ ДУШМАНӢ ҲАРГИЗ НАМЕОРАД САМАР

Боиси таассуф, изтиробу ташвиш аст, ки айни ҳол терроризму экстремизм дар сайёра вазъи ноором, қатлу ғоратро ба бор овардааст. Терроризм амали номатлубу зишт ва нафратовар буда, амнияти давлатро зери хатар мегузорад.

ТЕРРОРИЗМ — ВАБОИ АСР

Террористон мехоҳанд, мақсаду мароми худро бо ҳар роҳ амалӣ намоянд. Масъалаи мубориза бар зидди терроризму экстремизм ҳамеша зери таваҷҷуҳи хосаи Ҳукумати Ҷумҳурии Тоҷикистон қарор дорад. Зикр кардан лозим аст, ки хоинони миллат ва хоҷаҳои хориҷии онҳо то ҳанӯз аз нақшаҳои нопоку ғаразноки худ, даст накашидаанд. Онҳо то ба ҳол аз хориҷи кишвар бо тамоми роҳу воситаҳо кӯшиш карда истодаанд, ки вазъи ҷомеаи моро ноором созанд. Имрӯз терроризм беш аз ҳарвақта авҷ гирифта, бо оқибатҳои даҳшатовару бераҳмонаи худ ба проблемаи ҷиддитарини инсоният табдил ёфтааст.

Ман ҳамчун яке аз хонандагони доими ва сершумори рӯзномаи маҳбуби вилоят «Ҳақиқати Суғд» ҳаминро гуфтаниам, ки рӯзномаи дӯстдоштаи мо — «Ҳақиқати Суғд» рисолати азалӣ ва аслии худро бо ҳисси баланди масъулиятшиносӣ ва дарки воқеии ҳаёти сиёсии кишвар дар самти тарғибу ташвиқи сиёсати пешгирифтаи Ҳукумати Ҷумхурии Тоҷикистон, пешгирии шомилшавии ҷавонон ба ҳизбу созмонҳои террористию экстремистиро, ба ҷо оварда дар ин раванд ҳиссаи арзишманди худро гузошта истодааст. Дар ҳар шумора оид ба ин масъала мақолаҳои хонданибобу тарбиявӣ, тарғиботию ташвиқотӣ ва ахлоқӣ ба нашр мерасанд, ки арзандаи ситоиш аст. Зеро масъалаи мубориза бо терроризму экстремизм доғи ҷомеа буда, ба вабои асри XXI табдил ёфтааст. Аз ин рӯ, бетараф будан бешарафист.

Чунки шомилшавии ҷавонон ба ҳизбу созмонҳои террористӣ айни ҳол ташвишовар аст. Ҷавононро зарур аст, ки сатҳи дониши дунявӣ, динӣ ва ҳуқуқии худро мукаммал созанд, ба дурӯғу ваъдаҳои пучи душманони миллат фирефта нашуда, зиракии сиёсиро аз даст надиҳанд.

Ҳар як шаҳрванди ватандӯст бо дарки баланди ватандорӣ баҳри сазовор пешвоз гирифтани ҷашни бузурги 30-солагии Истиқолияти давлатии Ҷумҳурии Тоҷикистон барои ободу зебо гардидани ватани маҳбубу биҳиштосо, пешравиҳои соҳаҳои гуногун бояд саҳмгузор бошад.

Қурбонзода Хуршеда,

судяи Суди вилояти Суғд